Credit: amimage

 

而家的菲林價格水漲船高，令我地菲林玩家叫苦連天。究竟有無辦法節省我地的菲林開支呢？今日就同大家分享一下自己喺屋企手沖黑白菲林，慳錢又學到嘢！

 

Credit: analoguewonderland


 

首先，你要準備沖菲林嘅用具：黑袋，Developing Tank，藥水（Developer, fixer & stop bath），量杯，溫度計。

好似好濕碎好多嘢咁，但你可以係位於荔枝角嘅Camera Film Photo一次過買曬所有用具；如果唔想出門口，上網都唔難搵到，十分方便。

 

詳細嘅沖洗過程就唔係呢度同大家講啦，因為Youtube大把教學，詳細、專業過我係度用文字講100倍左右啦，但係有D心得同大家分享下，可以等大家行少啲彎路。

 

Credit: firstcall-photographic

 

第一樣就係Developing Tank入面嘅Reel(上圖白色個舊），呢樣用具我唔建議貪平。佢嘅作用係俾你load菲林入去，然後均勻地浸係藥水入面沖洗。

Load菲林上reel呢個動作需要係黑袋入面進行，所以你係只可以單憑觸覺去操作。

品質唔好嘅reel會令你係loading呢個過程困難重重，極高可能會刮花/摺皺底片，甚至loading失敗，令你成個過程功虧一簣。


 

Credit: goldstreetstudios

 

第二，就係藥水嘅選擇啦。最主要嘅藥水有Developer, Stop Bath同Fixer。

 

佢地主要負責菲林沖洗嘅三個步驟：1. 顯影；2. 停顯，暫停顯影液繼續作用；3. 定影，將底片上嘅影像固定。

 

最令新手頭痛嘅係，顯影液Developer嘅牌子琳瑯滿目，每一種藥水對應唔同菲林嘅顯影時間都唔同，點揀好？直接講結論，推薦大家用Rodinal Developer。

 

最大原因係佢平，而且佢算係多人用嘅一種formula，上網可以搵到好多人嘅心得。當你熟練左之後再試其他牌子都唔遲啦。

 

Credit: moment

 

第三樣就係藥水溫度啦。喺沖洗過程入面，最標準嘅developer藥水溫度係恆溫20度，但呢個溫度唔係絕對的。

 

20度嘅水溫對香港嘅天氣黎講其實都幾苛刻，除非屋企長開冷氣，否則好難做到成個過程都維持係20度。

 

咁我地可以點樣應對呢？其實藥水嘅溫度同沖洗嘅時間有相對關係，就好似光圈同快門嘅關係咁。

 

同樣嘅光線下，光圈開大左，快門就要快D；對藥水來講，藥水溫度高左，沖洗嘅時間就要短D，相反藥水低溫左，沖洗時間就要長D。

 

喺呢度推介一個網址俾大家做參考：https://www.digitaltruth.com/devchart.php 。入面可以睇到唔同藥水係唔同溫度，對唔同底片嘅時間，十分實用。


 

其實手沖黑白菲林喺以前算係菲林嘅入門課，因為可以透過呢個過程更加了解菲林嘅本質，亦都可以係攝影創作嘅一部分。 希望大家都一齊入坑手沖黑白菲林，享受到當中嘅樂趣啦。

 

Written by Yum

Instagram: @y_analogue